ဆိုးလ်နှင့် စစ်ရေးလေ့ကျင့်မှုများ လျှော့ချပြီးနောက် ကင်မ်နှင့် အဆက်အသွယ်ရှိကြောင်း ထရမ့် အရိပ်အမြွက်ပြောဆို
တောင်ကိုရီးယားနှင့် စစ်ရေးလေ့ကျင့်မှုများကို လျှော့ချခဲ့ပြီး မြောက်ကိုရီးယားခေါင်းဆောင်နှင့် ၎င်း၏ဆက်ဆံရေးကို ချီးကျူးပြောဆိုခဲ့ပြီးနောက် တစ်ရက်အကြာ တနင်္လာနေ့တွင် ၎င်း၏ မကြာသေးမီက ကမ်းလှမ်းမှုများကို ကင်မ်ဂျုံအန်းဘက်မှ တုံ့ပြန်မှုရှိခဲ့ကြောင်း အမေရိကန်သမ္မတ ဒေါ်နယ်ထရမ့်က ပြောကြားခဲ့သည်။
အိမ်ဖြူတော်တွင် ၎င်း၏ပထမသက်တမ်းအတွင်း ကင်မ်နှင့် သုံးကြိမ်တိုင်တိုင် တွေ့ဆုံခဲ့သော်လည်း ဒုတိယသက်တမ်းအတွင်း မတွေ့ဆုံရသေးဘဲ ၎င်းတို့နှစ်ဦး၏ ဆက်ဆံရေးမှတစ်ဆင့် အခြေအနေများကို “ပိုမိုလုံခြုံစိတ်ချရအောင်” လုပ်ဆောင်နေကြောင်း ထရမ့်က ပြောကြားခဲ့သည်။
နျူကလီးယားလက်နက်ပိုင်ဆိုင်ထားသော မြောက်ကိုရီးယားခေါင်းဆောင်ကို ချီးကျူးနေချိန်တွင် အီရန်ကိုတိုက်ခိုက်ရာ၌ ဝါရှင်တန်အား ကူညီရန် ပျက်ကွက်ခဲ့သည့်အတွက် အဓိကမဟာမိတ်ဖြစ်သော ဆိုးလ်ကို သူက ပြစ်တင်ဝေဖန်ခဲ့သည်။ အဆိုပါစစ်ပွဲမှာ တီဟီရန်(အီရန်)တို့ အနုမြူဗုံးရရှိရေးကို ဟန့်တားရန် ရည်ရွယ်သည်ဟု ထရမ့်က ဆိုသည်။
ပြီးခဲ့သည့်နှစ်က ရုံးပြန်တက်ပြီးကတည်းက ဆွေးနွေးရန်တောင်းဆိုမှုများကို ကင်မ်က ဘာကြောင့် အကြောင်းမပြန်တာလဲဟု မေးမြန်းရာ ထရမ့်က “သူ အကြောင်းမပြန်ဘူးဆိုတာ ခင်ဗျားတို့ ဘယ်လိုသိလဲ” ဟု အိုဗယ်ရုံးခန်းအတွင်းရှိ သတင်းထောက်များကို ပြန်လည်မေးခွန်းထုတ်ခဲ့သည်။
ကင်မ်က တကယ်ပဲ တုံ့ပြန်ခဲ့သလားဟု ဖိအားပေးမေးမြန်းသောအခါ ထရမ့်က “ဟုတ်တယ်၊ သူ တုံ့ပြန်ခဲ့တယ်” ဟု ဖြေကြားခဲ့သည်။
ကင်မ်နှင့် ဆွေးနွေးမှုများ မည်သည့်အဆင့်တွင် ရှိနေသနည်းဟု မေးမြန်းရာ ထရမ့်က “အရမ်းကို အပြုသဘောဆောင်ပါတယ်” ဟု ပြောကြားခဲ့သော်လည်း အသေးစိတ်ကိုမူ ထပ်မံမပြောကြားခဲ့ပေ။
ထို့နောက် ၎င်းတို့၏ ဆက်ဆံရေးသည် တင်းမာမှုများကို လျော့ကျစေသည်ဟုဆိုကာ ထရမ့်က ကင်မ်အပေါ် ၎င်း၏ချီးကျူးမှုကို ထပ်လောင်းပြောဆိုခဲ့သည်။
“ခင်ဗျားတို့ မြင်တဲ့အတိုင်းပဲ၊ ကျွန်တော်က အခြေအနေတွေကို ပိုပြီး လုံခြုံလာအောင် တကယ်လုပ်နေတာပါ။ ကင်မ်ဂျုံအန်းက ကျွန်တော့်ကို အမြဲတမ်း လေးလေးစားစား ဆက်ဆံပါတယ်” ဟု ထရမ့်က ပြောသည်။ “ကျွန်တော် သူ့ကို နားလည်သလို သူလည်း ကျွန်တော့်ကို နားလည်တယ်။”
တနင်္ဂနွေနေ့ညက သူ၏ Truth Social လူမှုကွန်ရက်ပေါ်တွင် တောင်ကိုရီးယားကို ဦးတည်၍ ဆိုးလ်နှင့်ပြုလုပ်နေသည့် “မသင့်လျော်ဘဲ ရန်လိုသော” စစ်ရေးလေ့ကျင့်မှုများကို လျှော့ချရန် ပင်တဂွန်စစ်ဌာနချုပ်ကို အမိန့်ပေးခဲ့ကြောင်း ထရမ့်က ရုတ်တရက် ကြေညာခဲ့သည်။
