တနင်္ဂနွေနေ့ ညပိုင်းက ဆီယက်တဲလ်မြို့တွင် ကျင်းပသည့် အစားအသောက် ပွဲတော်ကြီးတစ်ခု၌ သေနတ်သမား နှစ်ဦး အပြန်အလှန် ပစ်ခတ်ခဲ့ကြသည်ဟု ရဲတပ်ဖွဲ့က ယူဆထားသော ဖြစ်စဉ်အတွင်း လူ ၃ ဦး သေဆုံးပြီး အခြား ၄ ဦး ဒဏ်ရာရရှိခဲ့သည်။
Bite of Seattle ပွဲတော်ကို လက်ခံကျင်းပနေသည့် ဆီယက်တဲလ်စင်တာ (Seattle Center) မှနေ၍ သေနတ်သမား တစ်ဦးမှာ ထွက်ပြေးလွတ်မြောက်သွားသဖြင့် ရှာဖွေလျက်ရှိပြီး အခြားသေနတ်သမား တစ်ဦးမှာမူ ရဲတပ်ဖွဲ့နှင့် ရင်ဆိုင်တွေ့ပြီးနောက် လက်နက်ချ အဖမ်းခံခဲ့သည်ဟု ဆီယက်တဲလ် ရဲတပ်ဖွဲ့ ဒုတိယရဲမှူး တိုင်ရွန် ဒေးဗစ် (Tyrone Davis) က ညဉ့်နက်ပိုင်း သတင်းစာရှင်းလင်းပွဲတွင် ပြောကြားခဲ့သည်။
“သူတို့အချင်းချင်း အပြန်အလှန် ပစ်ခတ်ခဲ့ကြတယ်လို့ ကျွန်တော်တို့ ယူဆရတဲ့ လူနှစ်ဦး ရှိပါတယ်” ဟု ဒေးဗစ်က ပြောသည်။
မြို့တော်၏ အထင်ကရ Space Needle တည်ရှိရာ အဆိုပါ မြို့ပြစင်တာဝင်းအတွင်း လူခုနစ်ဦး ပစ်ခတ်ခံခဲ့ရခြင်း ဖြစ်သည်။
သေဆုံးသွားသူ သုံးဦးမှာ အသက် ၁၉ နှစ်အရွယ် အမျိုးသားတစ်ဦး၊ ၄၄ နှစ်အရွယ် အမျိုးသားတစ်ဦးနှင့် ၅၆ နှစ်အရွယ် အမျိုးသမီးတစ်ဦးတို့ ဖြစ်ကြောင်း တနင်္လာနေ့ နံနက်အစောပိုင်းတွင် ရဲတပ်ဖွဲ့က ထုတ်ပြန်ခဲ့သည်။ လူနှစ်ဦးမှာ အခင်းဖြစ်ပွားရာ နေရာတွင်ပင် သေဆုံးခဲ့ပြီး တတိယမြောက်လူမှာ ဆေးရုံတွင် သေဆုံးသွားခဲ့ခြင်းဖြစ်သည်။
ဒဏ်ရာရရှိသူ လေးဦး (လမ်းလျှောက်စ ကလေးငယ် တစ်ဦး အပါအဝင်) ကို ဒေသတွင်း အဆင့်မြင့်ဆုံး ထိခိုက်ဒဏ်ရာကုသရေးဌာနဖြစ်သော ဟာဘာဗျူး (Harborview) ဆေးကုသမှုစင်တာသို့ ပို့ဆောင်ခဲ့ပြီး ၎င်းတို့အနက်မှ တစ်ဦး သေဆုံးသွားခဲ့သည်ဟု ဒေးဗစ်က ပြောသည်။ ဆေးရုံ ပြောရေးဆိုခွင့်ရှိသူ ဆူဆန် ဂရက်ဂ် (Susan Gregg) က ဒဏ်ရာရသူများတွင် လက်မောင်း၊ ခြေထောက်၊ ဝမ်းဗိုက်နှင့် ခြေသလုံးတို့၌ သေနတ်ဒဏ်ရာများ ရရှိထားကြောင်း ပြောကြားခဲ့သည်။
နောက်ထပ် လူတစ်ဦးသည် သေနတ်ဒဏ်ရာဖြင့် ဝါရှင်တန်တက္ကသိုလ် ဆေးကုသမှုစင်တာသို့ နောက်ပိုင်းတွင် ရောက်ရှိလာခဲ့ပြီး ဒဏ်ရာရသူအားလုံး အခြေအနေ တည်ငြိမ်နေပြီဖြစ်ကြောင်း ဒေးဗစ်က ထပ်လောင်းပြောကြားခဲ့သည်။ “ကျန်လူနာတွေရဲ့ အခြေအနေကတော့ စိုးရိမ်စရာမရှိပါဘူး (ကလေးလူနာ ယောကျ်ားလေးတစ်ဦး၊ ၂၃ နှစ်အရွယ် အမျိုးသားတစ်ဦးနဲ့ ၃၉ နှစ်အရွယ် အမျိုးသမီးတစ်ဦး) ပါ” ဟု ဂရက်ဂ်က အီးမေးလ်မှတစ်ဆင့် ပြောကြားခဲ့သည်။
ဆီယက်တဲလ် မီးသတ်ဦးစီးဌာနမှ ပြောရေးဆိုခွင့်ရှိသူ ဂရေ့စ် နူးညက်ဇ် (Grace Nuñez) က အသေးစားဒဏ်ရာ ရရှိထားသည့် အသက် ၄၀ အရွယ် အမျိုးသမီး လူနာတစ်ဦးမှာ ဆေးရုံသို့သွားရန် ငြင်းဆန်ခဲ့သည်ဟု ပြောသည်။
ဖမ်းဆီးထိန်းသိမ်းခံထားရသူမှာ “လူငယ်တစ်ဦး” ဖြစ်ပြီး ၎င်းအား စစ်ဆေးမေးမြန်းမှုများ ပြုလုပ်နေကြောင်း ဒေးဗစ်က ပြောသည်။ ရဲအရာရှိများအနေဖြင့် ပစ်ခတ်နေသည်ကို မြင်တွေ့ခဲ့ရသည့် တစ်ဦးတည်းသောသူမှာ အဆိုပါ ဖမ်းဆီးခံရသူပင်ဖြစ်ပြီး ရင်ဆိုင်ရချိန်အတွင်း ရဲတပ်ဖွဲ့ဘက်မှ သေနတ်ပြန်လည်ပစ်ခတ်ခဲ့ခြင်း မရှိကြောင်း ၎င်းက မှတ်ချက်ပြုခဲ့သည်။
ဒုတိယမြောက်လူမှာ ထွက်ပြေးလွတ်မြောက်သွားသော်လည်း “ပြည်သူတွေအတွက်တော့ အခြား ခြိမ်းခြောက်အန္တရာယ် မရှိတော့ဘူးလို့ ကျွန်တော်တို့ ယုံကြည်ပါတယ်” ဟု ဒေးဗစ်က ဆိုသည်။ အခင်းဖြစ်ပွားရာနေရာမှ သေနတ်နှစ်လက်ကို သိမ်းဆည်းရမိခဲ့သည်ဟု ၎င်းက ပြောသည်။
ဆီယက်တဲလ် မြို့တော်ဝန် ကေတီ ဝီလ်ဆင် (Katie Wilson) က ယခုပစ်ခတ်မှုမှာ “မယုံနိုင်စရာကောင်းလောက်အောင် ဝမ်းနည်းဖွယ်ရာဖြစ်ပြီး ကြောက်မက်ဖွယ်ကောင်းသော အကြမ်းဖက်လုပ်ရပ်တစ်ခု” ဖြစ်ကြောင်း ခေါ်ဆိုပြောကြားခဲ့သည်။
သတင်းစာရှင်းလင်းပွဲတွင် သူမက “ဒီကနေ့ ဖြစ်သွားတဲ့အရာတွေအတွက် တုန်လှုပ်နေကြရတဲ့ အသိုင်းအဝိုင်းထဲက လူတိုင်း၊ သားကောင်ဖြစ်ခဲ့ရသူတွေနဲ့ သူတို့ရဲ့ မိသားစုဝင်တွေနဲ့အတူ ကျွန်မရဲ့ နှလုံးသားက ထပ်တူရှိနေပါတယ်” ဟု ပြောကြားခဲ့သည်။
စောပိုင်းက ထုတ်ပြန်ချက်တစ်ခုတွင် ပြည်သူများ ဘေးကင်းရာသို့ ရောက်ရှိစေရန် ကူညီပေးခဲ့ကြသည့် မီးသတ်သမားများ၊ ပွဲတော်ဝန်ထမ်းများနှင့် ဘေးနားရှိ ပြည်သူများ အပါအဝင် အရေးပေါ် ကယ်ဆယ်ရေးသမားများနှင့် ဒဏ်ရာရသူများကို ကုသပေးခဲ့သော ဆေးရုံဝန်ထမ်းများကို သူမက ကျေးဇူးတင်စကား ပြောကြားခဲ့သည်။
အမေရိကန် အရက်၊ ဆေးရွက်ကြီး၊ သေနတ်နှင့် ဖောက်ခွဲရေးပစ္စည်းများဆိုင်ရာ ဗျူရို (ATF) ၏ ဆီယက်တဲလ်ရုံးက ၎င်းတို့၏ အထူးအေးဂျင့်အချို့သည် အခင်းဖြစ်ပွားရာနေရာ၌ ရောက်ရှိနေပြီး စုံစမ်းစစ်ဆေးမှုများတွင် ဆီယက်တဲလ်ရဲတပ်ဖွဲ့အား ကူညီပေးနေကြောင်း X လူမှုကွန်ရက်တွင် ပြောကြားခဲ့သည်။
ဝါရှင်တန် ဒီမိုကရက်တစ်လွှတ်တော်အမတ် ပရာမီလာ ဂျေယာပေါ (Pramila Jayapal) က ဖက်ဒရယ်အစိုးရ၏ အကူအညီများရရှိရန် တာဝန်ရှိသူများက လုပ်ဆောင်သွားမည်ဖြစ်ကြောင်း ပြောကြားခဲ့သည်။
အဆိုပါ အစားအသောက် ပွဲတော်မှာ ၃ ရက်ကြာ ကျင်းပသည့် ၎င်းတို့၏ နှစ်ပတ်လည်ပွဲတော် နောက်ဆုံးနေ့ဖြစ်သော တနင်္ဂနွေနေ့တွင် ပွဲသိမ်းရန် ပြင်ဆင်နေချိန်ဖြစ်သည်။
အက်စတန် ဝါကိုနာဘို (Estan Wakonabo) သည် ၎င်း၏ ချစ်သူကောင်မလေးနှင့်အတူ ဓာတ်ပုံရိုက်ရန် တန်းစီစောင့်ဆိုင်းနေစဉ် ၎င်းတို့ပတ်ဝန်းကျင်ရှိ လူများ အပြင်းအထန် ပြေးလွှားလာကြသည်ကို မြင်ခဲ့ရကြောင်း ဆီယက်တဲလ်အခြေစိုက် NBC ၏ မိတ်ဖက်သတင်းဌာနဖြစ်သော KING သို့ ပြောကြားခဲ့သည်။ “လူတွေ ကြိတ်ကြိတ်တိုး ပြေးလွှားနေကြတာပါပဲ” ဟု ၎င်းက ဆိုသည်။
မကြာမီမှာပင် မြေပြင်ပေါ်တွင် လဲကျနေသူများကို သတိထားမိခဲ့ပြီး အချို့မှာ သိသိသာသာ သေနတ်ဒဏ်ရာများ ရရှိထားသည်ကို တွေ့ခဲ့ရကြောင်း ဝါကိုနာဘိုက ပြောသည်။ “နေရာတိုင်းမှာ လူကိုယ်ခန္ဓာတွေချည်းပါပဲ” ဟု မြေပြင်ပေါ်တွင် ဒဏ်ရာရထားပုံပေါ်သူများ ရှိနေခြင်းကို ၎င်းက ပြောသည်။ “ကျွန်တော်ဆိုရင် ၈ ယောက်လောက် ရေတွက်မိလိုက်တယ်”
ပေါလ် စကင်နာ (Paul Skinner) သည် ရုတ်ရုတ်သဲသဲ စတင်ဖြစ်ပွားချိန်တွင် Crave အစားအသောက်ကားအတွက် Bite of Seattle တွင် ဆိုင်ခန်းဖွင့်ရန် ကူညီဆောင်ရွက်ပေးနေခြင်းဖြစ်ကြောင်း ၎င်းက ပြောသည်။
“အစကတော့ ဗြောက်အိုးဖောက်သံလိုလိုပဲ ကြားလိုက်တာ၊ ဒါပေမဲ့ အဲဒီလိုအသံမျိုးဖြစ်ဖို့ကျတော့လည်း လူနည်းနည်းများနေတယ်။ ပြီးတော့ လူအုပ်ကြီးက အုပ်စုလိုက်ကြီး အမြန်ပြေးလွှားလာကြတော့ တစ်ခုခုဖြစ်နေပြီဆိုတာ သိလိုက်ရတယ်” ဟု ၎င်းက KING သို့ ပြောသည်။ ၎င်းက “ကျွန်တော်တို့ အားလုံး အောက်ကိုငုံ့ပြီး ပုန်းခိုနေခဲ့ရတယ်” ဟု ထပ်ပြောသည်။
အိုင်ဇိုင်းယား ဖလောရက်စ် ဆန်းချက်ဇ် (Isaiah Flores Sanches) ကလည်း သေနတ်သံ ကြားခဲ့ရပုံကို ပြန်လည်ဖော်ပြခဲ့သည်။
“အရမ်းကို ပျော်စရာကောင်းနေတဲ့ အခြေအနေကနေ အရမ်းကို ကြောက်စရာကောင်းတဲ့ အခြေအနေဆီကို ချက်ချင်း ပြောင်းသွားတာပဲ၊ မြေပြင်ပေါ်မှာ ပုန်းခိုဖို့ ကြိုးစားနေကြတဲ့ လူတွေကို ကျွန်တော် မြင်ခဲ့ရတယ်” ဟု သူက KING ကို ပြောပြသည်။
Bite of Seattle အနေဖြင့် ဝင်ကြေးအခမဲ့ဖြင့် သုံးရက်ကြာ ကျင်းပသော ၎င်းတို့၏ နှစ်ပတ်လည်ပွဲတော်သို့ လူပေါင်း ၃၅၀,၀၀၀ ကျော်ကို ဆွဲဆောင်နိုင်ကြောင်း သိရသည်။ “Bite of Seattle က အရမ်းကို ကောင်းမွန်တဲ့ ပွဲတော်တစ်ခုပါ” ဟု ဒေးဗစ်က ပြောသည်။ “မကြာသေးမီ နှစ်တွေအတွင်းက ဘာပြဿနာမှ မရှိခဲ့ပါဘူး”
ပွဲစီစဉ်သူများက မှတ်ချက်ပေးရန် တောင်းဆိုမှုကို ချက်ချင်းတုံ့ပြန်ခဲ့ခြင်း မရှိပေ။
