သမ္မတ၊ လွှတ်တော်ဥက္ကဋ္ဌနှင့် ကိုယ်စားလှယ်များ ခြေ/ဥကြောင့် ရာထူးရလာသည်ကို မမေ့ရန်လိုဟု တပ်မတော် ပြောကြား

130

နေပြည်တော်၊ ဩဂုတ် ၂၈

သမ္မတ ၊ လွှတ်တော်ဥက္ကဋ္ဌများနှင့် လွှတ်တော်ကိုယ်စားလှယ်များသည် ၂၀၀၈ အခြေခံဥပဒေကြောင့်ဖြစ်လာသည်ကို မမေ့ကြရန်လိုကြောင်း တပ်မတော်သား လွှတ်တော်ကိုယ်စားလှယ် ဗိုလ်မှူးဒေါ်သူဇာရွှေက လွှတ်တော်တွင် ပြောကြားလိုက်သည်။

လက်ရှိဖွဲ့စည်းပုံကြောင့် သမ္မတ ဦးထင်ကျော်၊ ဦးဝင်းမြင့်အစိုးရ၊ ယခုလွှတ်တော်နှင့် လွှတ်တော်ဥက္ကဋ္ဌများ၊ လစာဆယ်သိန်းရနေတဲ့ လွှတ်တော်အမတ်များ တည်ရှိနေတာကို မမေ့ကြဖို့လိုပါတယ်”ဟု ၎င်းက ဆွေနွေးပြောကြားခဲ့သည်။

ဩဂုတ်လ၂၈ ရက်က ကျင်းပသည့် ပြည်ထောင်စုလွှတ်တော်တွင် ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီက တင်သွင်းထားသည့် အခြေခံဥပဒေ ဒုတိယအကြိမ် ပြင်ဆင်ရေးဟုဆိုသော အခြေခံဥပဒေပါ ပုဒ်မ ၂၄၈ ၊၂၆၄ ၊ ၃၂၂ နှင့် ၄၀၂ တို့ကို ပြင်ဆင်ရန်တင်ပြထားခြင်းကို စိစစ်ရေး ကော်မတီက ၄၅ ဦးပါဝင်သောကော်မတီ (NLD ပါတီမှ ခြေ/ဥတစ်ရပ်လုံးစိစစ် ပြင်ဆင်ရေးပူးပေါင်းကော်မတီ) ၏ လုပ် ဆောင်ချက်အတွင်းထည့်သွင်းရန် တင်ပြမှုကို ကိုယ်စားလှယ်များက ဆွေးနွေးရာတွင် ၎င်းက အထက်ပါအတိုင်း ထည့်သွင်းပြောကြားခဲ့ခြင်းဖြစ်သည်။

ယင်းအစီရင်ခံစာကို ကိုယ်စားလှယ် ၃၄ ဦးက ဆွေးနွေးရာတွင်တပ်မတော်သား ကိုယ်စားလှယ် ၁၇ ဦးက ကန့်ကွက်ဆွေးနွေးထားခြင်းဖြစ်ပြီး ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီကလည်း အလားတူ ကန့်ကွက်ထားသည်ကို တွေ့ရသည်။

ယခင်အစိုးရ၊ ယခင်လွှတ်တော် (၂၀၁၁-၂၀၁၅) သည်လည်း အခြေခံဥပဒေနှင့် အညီကတိသစ္စာပြုကာ ရွေးကောက်ပွဲပြုလုပ်၍ လက်ရှိ အစိုးရအား အာဏာလွှဲပြောင်းပေးလိုက်ခြင်းသာ ဖြစ်ကြောင်း ဒေါ်သူဇာရွှေက ထပ်လောင်း ပြောကြားသည်။

ဩဂုတ်လ ၂၃ ရက် မွန်းလွဲပိုင်းက ကျင်းပသည့် ပြည်ထောင်စုလွှတ်တော်တွင် ယခုကဲ့သို့ ပြင်ဆင်ရေးလမ်းကြောင်း ကို ၄၅ ဦးကော်မတီ၏ လုပ်ငန်းစဉ်တွင် ထည့်သွင်းလိုက်ခြင်း၊ ၄၅ ဦးကော်မတီ၏ အခြေခံဥပဒေပြင်ဆင်ရေးလုပ်ငန်းများလုပ်နေခြင်းသည် ဖွဲ့စည်းပုံ အခြေခံဥပဒေကို ဖောက်ဖျက်နေခြင်းသာဖြစ်ကြောင်း တပ်မတော်သား ကိုယ်စားလှယ်များက ကန့်ကွက်ပြောဆိုထားပြီးလည်း ဖြစ်သည်။

“ရှေ့ကသွားမယ်ဆိုတော့လည်း မထားခဲ့နဲ့ တူတူသွားရအောင်ဆိုပြီး တားတယ်၊ နောက်ကလိုက်ခဲ့ပါဆိုလို့ လိုက်ပြန်တော့လည်း အချိန်တွေသာကုန်သွားတယ်၊ မောင်ပုံက ခုထိစောင်းတီးသင်လို့ကို မပြီးသေးဆိုတာမျိုးလို ဖြစ်နေပါတယ်။

ဘာနဲ့ အလားသဏ္ဍာန်တူလဲဆိုရင် ဖြူးနေအောင် ဖောက်ပေးထားတဲ့ လမ်းမကြီး၊ ဘေးကင်းလုံခြုံစိတ်ချရတဲ့ လမ်းမကြီးသွားမယ့် ခရီးကို တိကျသေချာစွာရောက်အောင်သွားနိုင်မယ့် လမ်းမကြီးတစ်ခုကို အဆင်သင့်လည်း ဖောက်ပေးထားပြီးပြီ။

အဲဒီလမ်းကို တကယ်အားကိုး ယုံကြည်ဆုပ်ကိုင်ပြီး သွားဖို့လုပ်နေတဲ့ လူတစ်စုကို ဒီလမ်းချိုးလေးကဝင်၊ ဟိုလမ်းချိုးလေးကထွက် ဖောက်ပေးထားတဲ့ လမ်းကိုမသုံးဘဲ ချောင်ကြိုချောင်ကြားက သွားကြမယ့် လူတစ်စုနှင့်အတူ လိုက်သွားပါလားလို့ အကြံပြုနေသလိုဖြစ်နေပါတယ်”ဟု ဗိုလ်ကြီး ဒေါ်အေးသဉ္ဇာကျော်ကက ကန့်ကွက်ဆွေးနွေးခဲ့သည်။

အခြေခံဥပဒေပြင်ဆင်ရေးလုပ်ငန်း စဉ်များအတွက် ကန့်ကွက်မှုများရှိနေသော်လည်း ဥပဒေလမ်းကြောင်း အတိုင်းသာ လုပ်ဆောင်နေခြင်းဖြစ်ကြောင်း NLD ပါတီမှ လွှတ်တော်ကိုယ်စားလှယ်များက ပြန်လည် ထောက်ပြပြောဆိုထားသည်။

ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီမှ တင်သွင်းလာသည့် ပြင်ဆင်ချက်သည် ၄၅ ဦးကော်မတီ၏ ပြင်ဆင်ရေးလုပ်ငန်းနှင့် အပြိုင်ဖြစ် နေသောကြောင့် အချိတ်အဆက်မမိပါက အကျိုးမဲ့သွားနိုင်သောကြောင့် စိစစ်ရေးကော်မတီက ၄၅ ဦးကော်မတီ၏ လုပ်ငန်းစဉ်များကို ထည့်သွင်းထားခြင်းဖြစ်ကြောင်း NLD ကိုယ်စားလှယ် ဒေါ်မာမာခိုင် (သထုံမဲ ဆန္ဒနယ်) က ဆွေးနွေးပြောဆိုသည်။

ဥပဒေတစ်ခုကိုပြင်ဆင်လိုပါက တစ်ခုထဲကို ကွက်၍ ပြင်ဆင်၍မရသကဲ့သို့ အစ၊ အလယ်၊ အဆုံး သုံးသပ်ဆင်ခြင်၍ ရှေ့နောက်ညီအောင် ရေးဆွဲရသည်ကို ဗဟုသုတ အဖြစ်မျှဝေပြောကြားလိုကြောင်း၊ ပြင်ဆင်ရေးတွင် အချိတ်အဆက်မမိပါက အကျိုးမဲ့သွားမည်ကို စိုးရိမ်သောကြောင့် စိစစ်ရေးကော်မတီက ၄၅ ဦးကော်မတီ လုပ်ငန်းစဉ်သို့ ထည့်သွင်းလိုခြင်းဖြစ်ကြောင်း ၎င်းက ထပ်လောင်းပြောကြားသည်။

“နိုင်ငံသားအားလုံး ဘေးကင်းစွာခိုလှုံနိုင်ဖို့အတွက် ပင်မအဆောက်အအုံဖြစ်တဲ့ ဒီဖွဲ့စည်းပုံအခြေခံဥပဒေကြီးကို ပြန်လည်ပြင်ဆင်တည်ဆောက်နိုင်ဖို့ အဟန့်အတားဖြစ်နေတဲ့ ဆူးညှောင့် ခလုတ်တွေ ချိုင့်ဝှမ်းတွေကို ကျွန်မတို့ အားလုံး ကိုယ်စားပြုတဲ့ အစုအဖွဲ့တွေကရှင်းလင်းထားပြီးတော့

လိုအပ်တဲ့ပစ္စည်းတွေ စုပြီး ခိုင်မာတဲ့ အုတ်မြစ်ချဖို့ ဆောင်ရွက်နေတဲ့ အချိန်မှာ မှအပြေးအလွှားနဲ့ အပြီးစလွယ် ဝါးတဲဝင်ထိုးရင် ရေရှည်ခိုင်ခန့်မှာမဟုတ်လို့ ပြည်သူတွေလည်း လက်ခံမှာ မဟုတ်သလို မူလနိုင်ငံတော်အာဏာပိုင်ရှင်ဖြစ်တဲ့ ပြည်သူတွေကို အလေးအနက်ထားရမယ့် ကိုယ်စားလှယ်တွေရဲ့တာဝန်အရ ကျွန်မ ဒီအစီရင်ခံစာကို ထောက်ခံနေတာ ဖြစ်ပါတယ်” ဟု ဒေါ်မာမာခိုင်က လွှတ်တော်သို့ တင်ပြပြောကြားသည်။

လက်ရှိဆွေးနွေးချက်များသည် တစ်ဖက်နှင့် တစ်ဖက်စကားလုံးဖြင့် အနိုင်ယူနေသကဲ့သို့ဖြစ်နေပြီး ရှေ့ဆက်၍ အငြင်းပွားနေပါက အခြေခံဥပဒေပြင်ဆင်ရေးသည် ရှေ့ကိုရောက်မည်မဟုတ်ကြောင်း ပြည်သူ့လွှတ်တော်ကိုယ်စားလှယ် ဒေါ်ခင်စောဝေ (ရသေ့တောင်မဲဆန္ဒနယ်) က The Voice သို့ မှတ်ချက်ပြုပြောကြားခဲ့သည်။

ကိုယ်စားလှယ်များ ကန့်ကွက်ဆွေးနွေးခြင်း၊ ထောက်ပြခြင်း၊ အကြံပြုခြင်းများကို လေ့လာစိစစ်ရေးကော်မတီက ပြန်လည်ရှင်းလင်းပေးရမည်ဖြစ်ကြောင်း ပြည်ထောင်စုလွှတ်တော်နာယက ဦးတီခွန်မြတ်က ပြောကြားထားသည်။

လွှတ်တော်ကိုယ်စားလှယ်များသည် လစာ ကျပ်ဆယ်သိန်းနှင့် နေ့တွက်စရိတ်၊ ခရီးသွားစရိတ်ကဲ့သို့သော အခြားလုပ်ပိုင်ခွင့်အနည်းငယ်ကို ဥပဒေအရ ခွင့်ပြုပေးထားသည်ကို တွေ့ရပြီး တပ်မတော်သားလွှတ်တော်ကိုယ်စားလှယ်များအနေနှင့် လစာကျပ် ဆယ်သိန်းကို မယူဘဲ တပ်မတော်မှ ပေးထားသည့်ရာထူးအလိုက် လစာရယူထားခြင်းလည်းဖြစ်သည်။

နိုင်ငံတော်မှပြဋ္ဌာန်းထားသည့် ဥပဒေအရ လစာကျပ် သိန်း ၅၀ ကို မယူမိခဲ့သော သမ္မတ ဦးသိန်းစိန် (၂၀၁၁-၂၀၁၅) ကို ဥပဒေနှင့် မညီကြောင်း အမျိုးသားလွှတ်တော်ဥက္ကဋ္ဌ (၂၀၁၁- ၂၀၁၅) က ဥပဒေနှင့် မညီဟု ပြောဆိုခဲ့ခြင်းကြောင်း သမ္မတဦးသိန်းစိန်သည် လစာကို အပြည့်အဝယူခဲ့ရကြောင်းမှတ်တမ်းများတွင် တွေ့ရှိရသည်။

[ ယခုသတင်းကို မိတ်ဖက်မီဒီယာ The Voice ၏ တရားဝင်ခွင့်ပြုချက်ဖြင့်ဖော်ပြခြင်း ဖြစ်ပါသည်။ ]